Საქართველოში მასწავლებლების 25%-მა (13 126 მასწავლებელმა) დისტანციური სწავლებისთვის შერჩეულ Microsoft Teams პლატფორმაზე რეგისტრაცია არ გაიარა. ტექნიკური ხარვეზების გამო, რომლებიც ძირითადად ინტერნეტის ხელმისაწვდომობასა და ქსელში გამართულად ჩართვას უკავშირდებოდა, გაკვეთილების  ნაწილი ვერ ან ნაწილობრივ ტარდებოდა.ოფიციალური მონაცემების დამუშავებით, ჩანს, რომ იმ ბავშვებიდან, რომლებიც ონლაინ პლატფორმაზე დარეგისტრირდნენ, 14 %-ს არ ჰქონდა კომპიუტერული ან სხვა სახის მოწყობილობა, რომლითაც გაკვეთილებს დაესწრებოდნენ. განათლების სამინისტროს მონაცემებს არაზუსტს უწოდებენ სპეციალისტები. დამოუკიდებელი კვლევებით, რომელიც სამოქალაქო ინტეგრაციისა და ეროვნებათშორისო ურთიერთობების ცენტრმა ატარებს, რიცხვები გაცილებით მაღალია. ირკვევა, რომ საგაკვეთილო პროცესში, საგაზაფხულო სემესტრის დროს, აქტიურად მხოლოდ მოსწავლეთა ნახევარი, 50% იყო ჩართული. საშემოდგომო სემესტრის მონაცემები განათლებისა და მეცნიერების სამინისტრომ ორგანიზაციას არ მისცა. საჯარო ინფორმაციის მოთხოვნის მიუხედავად, მონაცემები სამინისტრომ არც  “ClickMedia-ს” მოგვაწოდა.
2020 წლის მარტიდან ონლაინ სწავლებაზე გადავიდა მოლდოვაც. ევროპაში ერთერთი ღარიბი ქვეყნისთვის, საქართველოს მსგავსად, ინტერნეტთან წვდომა პრობლემა იყო როგორც სოფლად, ასევე დიდ ქალაქებში. სპეციალისტების ინფორმაციით, კომპიუტერები მხოლოდ 2500 მასწავლებელს გადასცეს, ანუ თითო სკოლაში ერთი ან ორი კომპიუტერი მიიტანეს. არასამთავრებო  ორგანიზაციების მონაცემებით, კომპიუტერით საგაკვეთილო პროცესში მონაწილეობას მოსწავლეთა ნახევარი ვერ იღებდა, ოფიციალური მონაცემებით, კი, მოსწავლეთა 16%-ს დისტანციურ სწავლებაში მონაწილეობა საერთოდ არ მიუღია. სპეციალისტები ფიქრობენ, რომ ოფიციალური მონაცემები არაზუსტია და დისტანციური სწავლების დროს, განათლების მიღება მოლდოვაში გაცილებით მეტმა მოსწავლემ ვერ შეძლო.